POUPANSA ORSAMENTU
Hala'o poupansa orsamentu signifika halo planu kona-ba jestaun rai osan kuantidade ki'ik ka boot husi osan ne'ebé ita simu lorloron, semana ka fulan.
Iha poupansa ita tenki kuda prinsipiu” fó Primeiru ba ita-nia ann” konseitu ne'e signifika katak antes ita gasta osan ba mehi ne'ebé ki'ik ka boot importante, ita tenke fó prioridade ba poupansa ne’ebé benefisiu ita rasik. Ita tenke rai osan iha konta poupansa uluk molok ita gasta osan ba buat oin-oin. Benefísiu husi poupansa
- Poupansa orsamentu bele ajuda ita asegura katak ita sei iha osan sufisiente atu nune'e bele tulun ba gastu sira ne'ebé prioridade no importante
- Poupansa orsamentu bele tulun hetan objetivu sira ne'ebé mak ita hakarak atinji iha futuru, hanesan kompra ka sosa televizaun foun, telefone foun, kareta foun, fo oan ba eskola favoritu no sira seluk-tan.
- Fundu husi poupansa tulun livre husi debe/tusan.
Maneira halo poupansa iha oin rua hanesan metodu tradisionál no konvensionál.
Metodu poupa tradisionál maneira antigu liu, ema bele rai deit osan balun iha fatin ne’ebe nia hakarak hanesan rai osan iha koverinu no safety box. Wainhira, fatin tau osan nakonu bele foti no hodi sosa sasan ne’ebé hakarak. Vantajen tradisionál mak hanesan: la presiza rekijitus, la presiza la’o dook, no fasil atu asesu wainhira presiza. Desvantajen metodu tradisionál mak hanesan posibilidade osan lakon, la simu ka hetan osan funan, labele uza halo tranzasaun dijitál ka online.
Poupansa konvensionál mak maneira rai osan iha institusaun finanseira sira hanesan banku. Banku sira fó opsaun ba kliente halo poupansa. Poupa iha banku fó oportunidade ba kliente atu hetan osan-funan tuir termu no kondisaun ne’ebe aplika iha banku idaidak nian. Sorin seluk, banku iha obrigasaun atu asegura no proteze kliente nia osan.
Motivasaun sempre akontese wainhira mosu vantajen iha asaun ruma. Entertantu hamoris esperitu poupansa no aplika iha prátika sei tulun disiplina rai osan balun husi rendementu, tulun evita gastu mak la nesesariu.
