Atividade Tinan 2015

Atividade tinan 2015

Iha 29 Novembru 2015, Banco Central Timor-Leste (BCTL) selebra aniversáriu dahuluk loron nasionál ba poupansa iha Centro de Convenções de Díli (CCD).

Serimónia ida-ne’e hanesan kontinuasaun hosi lansamentu ofisiál ba Programa Edukasaun Finanseira iha tinan kotuk ne’ebé BCTL anúnsiu ninian intensaun atu hala’o sensibilizasaun nasionál kona-ba finanseiru no kampaña ba poupansa, inklui mós fahe ba labarik sira kofriñu rai-osan, no promete atu kontribui ba sira ninian poupansa to’o osan valór másimu $100 wainhira labraik sira lori fali sira ninian kofriñu iha tinan ne’e.

Serimónia ne’e partisipa hosi ema liu hosi 1,000, inklui reprezentante hosi UNDP, Banku Mundiál, estudante ensinu báziku to’o sekundáriu iha Dili laran, Profesór sira, no-mós funsionáriu BCTL no Banku Komersiál sira nia oan.

Foto: Governador BCTL Sr. Abraão de Vasconselos no altu nivel hosi banku komersiu akompania loke kofrinho poupansa labarik nian antes hatama ba konta bankaria Hau Nia Futuru. Fatin: Sentru Konvensaun Dili

Programa importante hosi serimónia ne’e mak hafera kofriñu rai-osan no depózita osan mak rai iha kofriñu ne’e ba konta poupansa. Atividade ne’e hetan suporta hosi banku komesiál 4 iha Timor-Leste hanesan BNCTL, CGD/BNU- Timor, ANZ no Banku Mandiri, liu hosi loke balkaun ne’ebé dedika ba labarik sira atu hafera kofriñu rai-osan no depózita osan ne’e ba sira-nia konta poupansa iha banku.

Iha serimónia ne’e Banku Sentrál mos fahe premius ba labarik sira, liu husi labarik ne’ebé mak bele hatan ho diak ba perguntas kona ba poupansa no jestaun finanseira.